ਸ਼ਰਾਬ (ਮਿੰਨੀ ਕਹਾਣੀ)
ਕੁਲਜੀਤ ਦੀ ਸ਼ਰਾਬ ਪੀਣ ਦੀ ਆਦਤ ਵੱਧਦੀ ਜਾ ਰਹੀ ਸੀ। ਘਰਦੇ ਉਸਦੇ ਰੋਜ਼ ਸ਼ਰਾਬ ਪੀਣ ਤੋਂ ਬਹੁਤ ਦੁੱਖੀ ਸਨ। ਇੱਕ ਤਾਂ ਪੈਸੇ ਦੀ ਬਰਬਾਦੀ ਤੇ ਦੂਜਾ ਕੁਲਜੀਤ ਦੀ ਸਿਹਤ ਵੀ ਦਿਨੋਂ-ਦਿਨ ਖਰਾਬ ਹੁੰਦੀ ਜਾ ਰਹੀ ਸੀ। ਇੱਕ ਦਿਨ ਕੁਲਜੀਤ ਦੀ ਸਿਹਤ ਬਹੁਤ ਵਿਗੜ ਗਈ `ਤੇ ਉਸ ਨੂੰ ਨੇੜੇ ਦੇ ਸ਼ਹਿਰ ਲੈ ਗਏ। ਡਾਕਟਰ ਨੇ ਸਾਰੇ ਟੈਸਟ ਕਰਵਾਏ `ਤੇ ਰਿਪੋਰਟ ਆਉਣ ਤੇ ਉਸਨੇ ਕੁਲਜੀਤ ਦੇ ਪਿਤਾ ਨੂੰ ਇੱਕ ਤਰਫ਼ ਲਿਜਾ ਕੇ ਕਿਹਾ, “ਸਰਦਾਰ ਜੀ…ਤੁਹਾਡੇ ਮੁੰਡੇ ਦੇ ਦੋਵੇਂ ਗੁਰਦੇ ਖਰਾਬ ਹੋ ਚੁੱਕੇ ਹਨ। ਇਸ ਕੋਲ ਜ਼ਿੰਦਗੀ ਦੇ ਗਿਣਤੀ ਦੇ ਦਿਨ ਹੀ ਬਚੇ ਹਨ, ਇਲਾਜ ਦਾ ਵੱਕਤ ਲੰਘ ਚੁੱਕਾ ਹੈ। …ਮਾਫ਼ ਕਰਨਾ ਹੁਣ ਤਾਂ ਰੱਬ ਅੱਗੇ ਅਰਦਾਸ ਕਰੋ”।
ਕੁਲਜੀਤ ਦੇ ਪਿਤਾ ਥਾਏ ਹੀ ਪੱਥਰ ਹੋ ਗਏ ਤੇ ਮੂੰਹੋਂ ਬੁੜਬੜਾਏ, “ਡਾਕਟਰ ਸਾਹਬ ਕੁਲਜੀਤ ਠੇਕਿਆਂ ਦੀ ਸ਼ਰਾਬ ਤਾਂ ਖ਼ਤਮ ਨਹੀਂ ਕਰ ਸਕਿਆ ਪਰ ਸ਼ਰਾਬ ਨੇ ਇਸਨੂੰ ਜਰੂਰ ਖਤਮ ਕਰ ਦਿੱਤਾ ਹੈ। ਇਹ ਸ਼ਰਾਬ ਨੀਂ ਪੀ ਰਿਹਾ ਸੀ …ਸ਼ਰਾਬ ਮੇਰੇ ਪੁੱਤਰ ਨੂੰ ਪੀ ਰਹੀ ਸੀ”। ਕਹਿ ਕੇ ਉਹ ਧਾਹਾਂ ਮਾਰ ਕੇ ਰੋਣ ਲੱਗਾ।
 ਸੁਖਵਿੰਦਰ ਕੌਰ ‘ਹਰਿਆਓ’
ਸਕੱਤਰ ਮਾਲਵਾ ਲਿਖਾਰੀ ਸਭਾ, ਸੰਗਰੂਰ