ਕੈਲਗਰੀ, 13 ਦਸੰਬਰ (ਪੰਜਾਬ ਮੇਲ)- ਕੈਨੇਡਾ-ਅਮਰੀਕਾ ਸਰਹੱਦ ਤੋਂ ਤਕਰੀਬਨ 1 ਕੁਇੰਟਲ ਕੋਕੀਨ ਸਮੇਤ ਦੋ ਪੰਜਾਬੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਰਾਇਲ ਕੈਨੇਡੀਅਨ ਮਾਊਂਟਡ ਪੁਲਿਸ (ਆਰ.ਸੀ.ਐੱਮ.ਪੀ.) ਅਤੇ ਕੈਨੇਡੀਅਨ ਬਾਰਡਰ ਸਰਵਿਸਿਜ਼ ਏਜੰਸੀ (ਸੀ.ਬੀ.ਐੱਸ.ਏ.) ਨੇ ਸਾਂਝੀ ਕਾਰਵਾਈ ਦੌਰਾਨ ਇਸ ਪੰਜਾਬੀ ਜੋੜੇ ਨੂੰ ਗ੍ਰਿਫ਼ਤਾਰ ਕੀਤਾ। ਕੋਕੀਨ ਸਮੇਤ ਫੜੇ ਗਏ ਪੰਜਾਬੀ ਪਤੀ-ਪਤਨੀ ਦੀ ਪਛਾਣ ਗੁਰਮਿੰਦਰ ਸਿੰਘ ਤੂਰ (31) ਅਤੇ ਕਿਰਨਦੀਪ ਕੌਰ ਤੂਰ (26) ਵਜੋਂ ਹੋਈ ਹੈ। ਅਲਬਰਟਾ ਸੂਬੇ ਵਿਚ ਹੁਣ ਤੱਕ ਫੜੇ ਗਏ ਨਸ਼ੀਲੇ ਪਦਾਰਥਾਂ ਦੀ ਇਹ ਸਭ ਤੋਂ ਵੱਡੀ ਖੇਪ ਦੱਸੀ ਜਾ ਰਹੀ ਹੈ।
ਕੈਲਗਰੀ ਹਵਾਈ ਅੱਡੇ ਵਿਚਲੇ ਸੀ.ਬੀ.ਐੱਸ.ਏ. ਦਫ਼ਤਰ ‘ਚ ਸੱਦੀ ਪ੍ਰੈੱਸ ਕਾਨਫਰੰਸ ਦੌਰਾਨ ਇਹ ਖੁਲਾਸਾ ਕੀਤਾ ਗਿਆ। ਸੂਹੀਆ-ਤੰਤਰ ਦੀ ਸੂਚਨਾ ਬਾਅਦ ਸੀ.ਬੀ.ਐੱਸ.ਏ. ਅਤੇ ਆਰ.ਸੀ.ਐੱਮ.ਪੀ. ਨੇ ਇੱਕ ਟਰੱਕ ਦੀ ਛਾਣਬੀਣ ਕੀਤੀ, ਜੋ ਦੋ ਦਸੰਬਰ ਦੀ ਰਾਤ ਕੈਲੀਫੋਰਨੀਆ ਤੋਂ ਕੈਲਗਰੀ ਦਾ ਲੋਡ ਲੈ ਕੇ ਆ ਰਿਹਾ ਸੀ। ਸਭ ਤੋਂ ਪਹਿਲਾਂ ਪੁਲਿਸ ਨੇ ਦੱਸਿਆ ਕਿ ਜਦ ਉਨ੍ਹਾਂ ਨੇ ਟਰੱਕ ਦੀ ਜਾਂਚ ਕੀਤੀ ਗਈ, ਤਾਂ ਉਨ੍ਹਾਂ ਨੂੰ ਮਾਈਕ੍ਰੋਵੇਵ ‘ਚੋਂ ਡਰੱਗਜ਼ ਦੀਆਂ 8 ਬ੍ਰਿਕਸ ਮਿਲੀਆਂ, ਫਿਰ ਉਨ੍ਹਾਂ ਨੂੰ ਮਾਈਕ੍ਰੋਵੇਵ ਦੇ ਪਿਛਲੇ ਪਾਸਿਓਂ 14 ਬ੍ਰਿਕਸ (ਇੱਟਾਂ) ਮਿਲੀਆਂ। ਇਸ ਤੋਂ ਬਾਅਦ ਪੂਰੇ ਟਰੱਕ ਦੀ ਹੋਰ ਚੈਕਿੰਗ ਕੀਤੀ ਗਈ।
ਇਸ ਪੂਰੀ ਚੈਕਿੰਗ ਦੌਰਾਨ ਕੋਕੀਨ ਦੀਆਂ ਕੁੱਲ 84 ਇੱਟਾਂ ਬਰਾਮਦ ਹੋਈਆਂ, ਜੋ ਬਹੁਤ ਹੀ ਯੋਜਨਾਬੱਧ ਢੰਗ ਨਾਲ ਟਰੱਕ ‘ਚ ਛੁਪਾਈਆਂ ਗਈਆਂ ਸਨ। ਆਰ.ਸੀ.ਐੱਮ.ਪੀ. ਦੇ ਇੰਸਪੈਕਟਰ ਐਲਨ ਲੈਈ ਨੇ ਦੱਸਿਆ ਕਿ ਇਸ ਡਰੱਗ ਨੂੰ ਕੈਲਗਰੀ ਅਤੇ ਇਸ ਦੇ ਆਲੇ-ਦੁਆਲੇ ਦੇ ਇਲਾਕਿਆਂ ‘ਚ ਸਪਲਾਈ ਕੀਤਾ ਜਾਣਾ ਸੀ। ਬਰਾਮਦ ਕੀਤੀ ਕੋਕੀਨ ਦੀ ਕੀਮਤ ਅੰਦਾਜ਼ਨ 84 ਲੱਖ ਡਾਲਰ ਬਣਦੀ ਹੈ।
ਮੁਲਜ਼ਮ ਗੁਰਮਿੰਦਰ ਸਿੰਘ ਤੂਰ ਅਤੇ ਕਿਰਨਦੀਪ ਕੌਰ ਤੂਰ ਅਮਰੀਕਾ ਦੇ ਫਰਿਜ਼ਨੋ ਸ਼ਹਿਰ ਦੇ ਵਸਨੀਕ ਦੱਸੇ ਜਾ ਰਹੇ ਹਨ ਅਤੇ ਦੋਹਾਂ ਨੂੰ ਲੈਥਬ੍ਰਿਜ ਸ਼ਹਿਰ ਦੀ ਅਦਾਲਤ ‘ਚ ਪੇਸ਼ ਕੀਤਾ ਗਿਆ।