ਜੈਤਸਰ/ਰਾਜਸਥਾਨ, 3 ਜੁਲਾਈ (ਪੰਜਾਬ ਮੇਲ)- ਪਿਛਲੇ ਲਗਭਗ ਇਕ ਹਫ਼ਤੇ ਤੋਂ ਰਾਜਸਥਾਨ ਦੇ ਪਿੰਡ ਦਸ ਆਰਡੀ ਵਾਸੀ ਬ੍ਰਿਨਾਥ ਅਮਰੀਕਾ ‘ਚ ਰਹਿਣ ਵਾਲੇ ਆਪਣੇ ਪੁੱਤਰ ਦੀ ਮੌਤ ਮਗਰੋਂ ਹੀ ਉਸ ਦੀ ਲਾਸ਼ ਨੂੰ ਭਾਰਤ ਲਿਆਉਣ ਕਦੇ ਵਿਦੇਸ਼ ਮੰਤਰਾਲੇ ਅਤੇ ਕਦੇ ਗ੍ਰਹਿ ਮੰਤਰਾਲੇ ਦੇ ਚੱਕਰ ਕੱਟਣ ਨੂੰ ਮਜਬੂਰ ਹੈ। ਹਾਲਾਂਕਿ ਇਕ ਵਾਰ ਪੀੜਤ ਪਰਿਵਾਰ ਨੇ ਖੇਤਰੀ ਸੰਸਦ ਨਿਹਾਲਚੰਦ ਨੂੰ ਵੀ ਅਪੀਲ ਕੀਤੀ ਅਤੇ ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਦੇ ਦਫ਼ਤਰ ‘ਚ ਪੁੱਜ ਕੇ ਆਪਣਾ ਦੁੱਖ ਸੁਣਾਇਆ। ਪਰ ਇਸ ਦੇ ਬਾਵਜੂਦ ਪਿਛਲੇ ਲਗਭਗ 10 ਦਿਨਾਂ ਤੋਂ ਪੀੜਤ ਪਰਿਵਾਰ ਨੂੰ ਕਿਸੇ ਵੀ ਪੱਧਰ ‘ਤੇ ਕੋਈ ਸਕਾਰਾਤਮਕ ਉਮੀਦ ਦਿਖਾਈ ਨਹੀਂ ਦੇ ਰਹੀ। ਅਜਿਹੇ ‘ਚ ਹੁਣ ਪਰਿਵਾਰ ਕੇਂਦਰੀ ਰਾਜਧਾਨੀ ‘ਚ ਵੱਖ ਵੱਖ ਮੰਤਰਾਲਿਆਂ ‘ਚ ਦਰ-ਦਰ ਦੀਆਂ ਠੋਕਰਾਂ ਖਾਣ ਲਈ ਮਜਬੂਰ ਹੈ।
ਮ੍ਰਿਤਕ ਰਜਿੰਦਰਨਾਥ ਦੇ ਚਾਚਾ ਲੇਖਨਾਥ ਨੇ ਦੱਸਿਆ ਕਿ ਉਸ ਦਾ ਵੱਡਾ ਭਤੀਜਾ ਰਾਜਿੰਦਰਨਾਥ ਪਿਛਲੇ ਲਗਭਗ ਪੰਜ ਸਾਲਾਂ ਤੋਂ ਅਮਰੀਕਾ ‘ਚ ਰਹਿ ਰਿਹਾ ਸੀ। ਲਗਭਗ ਦੋ ਮਹੀਨੇ ਪਹਿਲਾਂ ਹੀ ਉਹ ਅਮਰੀਕਾ ਤੋਂ ਘਰ ਆਇਆ ਸੀ ਅਤੇ ਪਰਿਵਾਰਕ ਮੈਂਬਰਾਂ ਨੂੰ ਮਿਲ ਕੇ ਅਮਰੀਕਾ ਪਰਤ ਗਿਆ ਸੀ। ਇਸ ਵਿਚਾਲੇ ਉਸ ਦੇ ਛੋਟੇ ਭਰਾ ਸ਼ਿਵਨਾਥ ਦੀ 22 ਜੂਨ ਨੂੰ ਮੌਤ ਹੋ ਗਈ, ਜਿਸ ਦੀ ਜਾਣਕਾਰੀ ਪਰਿਵਾਰ ਵਾਲਿਆਂ ਨੇ ਅਮਰੀਕਾ ‘ਚ ਰਹਿ ਰਹੇ ਵੱਡੇ ਭਰਾ ਰਾਜਿੰਦਰਨਾਥ ਨੂੰ ਦਿੱਤਾ ਤਾਂ ਉਹ ਇਸ ਸਦਮੇ ਨੂੰ ਬਰਦਾਸ਼ਤ ਨਹੀਂ ਕਰ ਸਕਿਆ ਅਤੇ 23 ਜੂਨ ਨੂੰ ਦਿਨ ਦਾ ਦੌਰਾ ਪੈਣ ਨਾਲ ਉਸ ਦੀ ਅਮਰੀਕਾ ‘ਚ ਮੌਤ ਹੋ ਗਈ। ਇਸ ਦੀ ਜਾਣਕਾਰੀ ਉਸ ਦੀ ਕੰਪਨੀ ਦੇ ਪ੍ਰਤੀਨਿਧੀਆਂ ਅਤੇ ਨਾਲ ਕੰਮ ਕਰਨ ਵਾਲਿਆਂ ਨੇ ਰਾਜਿੰਦਰਨਾਥ ਦੇ ਪਰਿਵਾਰ ਨੂੰ ਦਿੱਤੀ। ਜਿਸ ਮਗਰੋਂ ਪਰਿਵਾਰ ਅਮਰੀਕਾ ਤੋਂ ਰਾਜਿੰਦਰਨਾਥ ਦੀ ਲਾਸ਼ ਲਿਆਉਣ ਲਈ ਦੌੜ-ਭੱਜ ਕਰ ਰਿਹਾ ਹੈ। ਪਿੰਡ ਦਸ ਆਰਡੀ ਵਾਸੀ ਬ੍ਰਿਜਨਾਥ ਦੇ ਦੋ ਹੀ ਪੁੱਤਰ ਸੀ। ਛੋਟਾ ਪੁੱਤਰ ਸ਼ਿਵਨਾਥ ਪਿੰਡ ‘ਚ ਹੀ ਕੰਮ ਕਰਦਾ ਸੀ। ਉਥੇ ਵੱਡਾ ਪੁੱਤਰ ਰਾਜਿੰਦਰਨਾਥ ਪਿਛਲੇ ਲਗਭਗ ਪੰਜ ਸਾਲਾਂ ਤੋਂ ਅਮਰੀਕਾ ‘ਚ ਰਹਿ ਰਹਾ ਸੀ। ਇੱਕੋ ਸਮੇਂ ਦੋਵਾਂ ਪੁੱਤਰਾਂ ਦੀ ਮੌਤ ਮਗਰੋਂ ਉਸ ਦਾ ਵਿਹੜਾ ਤਾਂ ਸੁੰਨਾ ਹੋ ਹੀ ਗਿਆ ਹੈ ਨਾਲ ਹੀ ਬੁਢਾਪੇ ਦਾ ਸਹਾਰਾ ਵੀ ਖ਼ਤਮ ਹੋ ਗਿਆ ਹੈ। ਆਪਣੀ ਦੁੱਖ ਭਰੀ ਕਹਾਣੀ ਦਸਦਿਆਂ ਬ੍ਰਿਨਾਥ ਫੁਟ-ਫੁਟ ਕੇ ਰੌ ਪਏ ਤੇ ਕਹਿਣ ਲੱਗੇ ਕਿ ਭਗਵਾਨ ਮੇਰੀ ਜਾਨ ਲੈ ਲੈਂਦਾ, ਪਰ ਪਰਿਵਾਰ ਦਾ ਸਹਾਰਾ ਤਾਂ ਛੱਡ ਦਿੰਦਾ।