ਮੈਲਬੌਰਨ ਵਿਖੇ ਭਗਵੰਤ ਮਾਨ ‘ਤੇ ਹੋਇਆ ਹਮਲਾ

ਮੈਲਬੌਰਨ, 8 ਮਾਰਚ (ਪੰਜਾਬ ਮੇਲ)- ਆਮ ਆਦਮੀ ਪਾਰਟੀ ਦੇ ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਅੱਜਕੱਲ੍ਹ ਆਸਟ੍ਰੇਲੀਆ ਦੌਰੇ ‘ਤੇ ਹਨ। ਇਸ ਦੌਰੇ ਦੌਰਾਨ ਮੈਲਬੌਰਨ ਵਿਖੇ ਚੱਲ ਰਹੀ ਇਕ ਭਰਵੀਂ ਰੈਲੀ ਦੌਰਾਨ ਕਿਸੇ ਸਿਰਫਿਰੇ ਨੇ ਭਗਵੰਤ ਮਾਨ ‘ਤੇ ਅਚਾਨਕ ਆਪਣੀ ਚੱਪਲ ਮਾਰਨ ਦੀ ਕੋਸ਼ਿਸ਼ ਕੀਤੀ, ਜਿਹੜੀ ਕਿ ਉਸ ਨੂੰ ਨਹੀਂ ਵੱਜੀ। ਚੱਪਲ ਸੁੱਟਣ ਤੋਂ ਬਾਅਦ ਇਸ ਹਮਲਾਵਰ ਨੇ ਉੱਚੀ-ਉੱਚੀ ਭਗਵੰਤ ਮਾਨ ਦੇ ਖਿਲਾਫ ਬੋਲਣਾ ਸ਼ੁਰੂ ਕਰ ਦਿੱਤਾ ਅਤੇ ਉਸ ‘ਤੇ ਕਈ ਤਰ੍ਹਾਂ ਦੀਆਂ ਤੋਹਮਤਾਂ ਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਸ ਦੌਰਾਨ ਆਮ ਆਦਮੀ ਪਾਰਟੀ ਦੇ ਸਥਾਨਕ ਵਰਕਰਾਂ ਨੇ ਹਮਲਾਵਰ ਨੂੰ ਕੁਟਾਪਾ ਵੀ ਚਾੜ੍ਹਿਆ। ਇਸ ਦੌਰਾਨ ਲੋਕ ਇਹ ਕਹਿ ਰਹੇ ਸਨ ਕਿ ਹਮਲਾਵਰ ਜਾਂ ਤਾਂ ਸ਼ਰਾਬੀ ਹੈ ਜਾਂ ਪਾਗਲ ਹੈ। ਇਸ ਵਾਰਦਾਤ ਨਾਲ ਹਾਲ ਵਿਚ ਬੈਠੇ ਲੋਕ ਇਕਦਮ ਹੱਕੇ-ਬੱਕੇ ਰਹਿ ਗਏ। ਪਹਿਲਾਂ ਤਾਂ ਉਹ ਇਸ ਗੱਲ ਨੂੰ ਸਮਝ ਹੀ ਨਹੀਂ ਸਕੇ ਕਿ ਕੀ ਹੋਇਆ ਹੈ। ਪਰ ਜਿਉਂ-ਜਿਉਂ ਹਾਲ ਵਿਚ ਬੈਠੇ ਲੋਕਾਂ ਨੂੰ ਪਤਾ ਲੱਗਾ, ਤਾਂ ਉਨ੍ਹਾਂ ਨੇ ਉਸ ਸਿਰਫਿਰੇ ਆਦਮੀ ਨੂੰ ਬਾਹਰ ਕੱਢ ਦਿੱਤਾ।